24 April, 2026 11:00:06 AM
മലപ്പുറത്ത് പാമ്പിനെ പോക്കറ്റിലിട്ട് ഇതര സംസ്ഥാന തൊഴിലാളി ചായ കുടിക്കാനെത്തി; ഒടുവിൽ കടി കിട്ടി
മലപ്പുറം: പാമ്പിനെ പോക്കറ്റിലിട്ട് ഇതര സംസ്ഥാന തൊഴിലാളിയുടെ അഭ്യാസം. ചായ കുടിക്കാനായി ഒതായി അങ്ങാടിയിലെത്തിയ ഇതര സംസ്ഥാന തൊഴിലാളിയുടെ പോക്കറ്റിലായിരുന്നു പാമ്പ് ഉണ്ടായിരുന്നത്. അണലിയാണെന്നാണ് നാട്ടുകാര് പറയുന്നത്.
എന്നാല് പരിശോധിച്ചാല് മാത്രമേ ഇക്കാര്യം വ്യക്തമായി പറയാന് സാധിക്കുകയുള്ളുവെന്ന് വനം വകുപ്പ് അറിയിച്ചു. ഇന്നലെയായിരുന്നു സംഭവം. ചായക്കടയില് ഇരിക്കുന്നതിനിടെ അരികിലുണ്ടായിരുന്ന ഒരാള്ക്ക് ഇയാള് പാമ്പിനെ കാണിച്ചുകൊടുത്തതോടെയാണ് നാട്ടുകാര് വിവരമറിയുന്നത്. പല തവണ ഇയാള്ക്ക് പാമ്പിന്റെ കടിയേല്ക്കുകയും ചെയ്തു.
ഇയാള് ഇടയ്ക്കിടെ പോക്കറ്റില് നിന്ന് പാമ്പിനെ പുറത്തെടുക്കുന്നതിന്റെ വീഡിയോ നാട്ടുകാര് പകര്ത്തിയിട്ടുണ്ട്. പാമ്പിന്റെ കടിയേറ്റ ഇയാളെ നാട്ടുകാര് നിര്ബന്ധിച്ച് ആശുപത്രിയിലെത്തിച്ചു. പാമ്പിനെ നാട്ടുകാര് പിടികൂടി കവറിലേക്ക് മാറ്റിയിട്ടുണ്ട്. ഇതര സംസ്ഥാന തൊഴിലാളി മദ്യലഹരിയിലായിരുന്നു എന്നാണ് നാട്ടുകാരുടെ സംശയം.
