06 November, 2026 09:56:22 AM
ഡൽഹിയിലെ കരോൾ ബാഗിൽ വൻ തീപിടിത്തം; ആളപായമൊന്നും റിപ്പോർട്ട് ചെയ്തിട്ടില്ല
ഡൽഹി: പ്രമുഖ വ്യാപാര കേന്ദ്രമായ കരോൾ ബാഗിലെ ഗഫാർ മാർക്കറ്റിൽ വൻ തീപിടിത്തം. ദീപാവലിക്ക് ദിവസങ്ങൾ മാത്രം ശേഷിക്കെ ധൻതേരാസ് ദിനമായ ഇന്ന് പുലർച്ചെയാണ് അപകടം ഉണ്ടായത്. ഗഫാർ മാർക്കറ്റിലെ ബ്ലോക്ക് 13-ൽ ചെയിൻ വാലി ഗലിയിലുള്ള പുരി പ്ലാസയിലെ മൊബൈൽ ആക്‌സസറികളും ബാറ്ററികളും സൂക്ഷിച്ചിരുന്ന കടയിലാണ് തീപിടിത്തമുണ്ടായത്. ഇത് പിന്നീട് നാല് നിലകളുള്ള വാണിജ്യ കെട്ടിടത്തിലേക്ക് പടരുകയായിരുന്നു.
ബാറ്ററികൾ അമിതമായി ചൂടാകുകയോ ചാർജ് ചെയ്യുകയോ ചെയ്തതാകാം തീപിടിത്തത്തിന് കാരണമെന്ന് പ്രഥമദൃഷ്ട്യാ തോന്നുന്നു. കൃത്യമായ കാരണം കണ്ടെത്തുന്നതിന് ഫയർ ഡിപ്പാർട്ട്‌മെന്റിൽ നിന്നും ഇലക്ട്രിക്കൽ ഇൻസ്‌പെക്ടറിൽ നിന്നും റിപ്പോർട്ട് വാങ്ങും. കത്തുന്ന മറ്റ് വസ്തുക്കളുടെ സാന്നിധ്യം വിലയിരുത്തുന്നതിന് എഫ്‌എസ്‌എൽ സംഘം കെട്ടിടം പരിശോധിക്കുകയും ചെയ്യും. അഗ്നിശമന പ്രവർത്തനങ്ങൾ തുടരുന്നതിനാൽ കൂടുതൽ വിവരങ്ങൾക്കായി കാത്തിരിക്കുന്നു.
