07 April, 2026 04:50:19 PM
സംസ്ഥാനത്ത് ഇന്ന് വൈകിട്ടോടെ മദ്യശാലകള് അടയ്ക്കും; രണ്ട് ദിവസം ഡ്രൈ ഡേ
തിരുവനന്തപുരം: നിയമസഭാ തെരഞ്ഞെടുപ്പിനോടനുബന്ധിച്ച് സംസ്ഥാനത്ത് ഡ്രൈ ഡേ പ്രഖ്യാപിച്ചു. വോട്ടെടുപ്പ് സുഗമമായി നടത്തുന്നതിന്റെ ഭാഗമായി ഏപ്രിൽ 7 ചൊവ്വാഴ്ച വൈകുന്നേരം ആറ് മണി മുതൽ വോട്ടെടുപ്പ് അവസാനിക്കുന്ന ഏപ്രിൽ 9 വ്യാഴാഴ്ച വൈകുന്നേരം ആറുവരെ സംസ്ഥാനത്ത് മദ്യവിൽപ്പന പൂർണ്ണമായും തടഞ്ഞിരിക്കുകയാണ്. വോട്ടെടുപ്പ് സമയം അവസാനിക്കുന്നതിന് 48 മണിക്കൂർ മുൻപ് തന്നെ ഈ ഉത്തരവ് നിലവിൽ വരും. കൂടാതെ വോട്ടെണ്ണൽ ദിനമായ മെയ് നാലിനും സംസ്ഥാനത്തെ മദ്യശാലകൾക്ക് പ്രവൃത്തിദിനമായിരിക്കില്ല.
ബിവറേജസ് ഔട്ട്ലെറ്റുകൾ, ബാറുകൾ, ക്ലബ്ബുകൾ, ഹോട്ടലുകൾ തുടങ്ങി എല്ലാത്തരം മദ്യവിൽപ്പന ശാലകൾക്കും ഈ നിരോധനം ബാധകമാണ്. നിശ്ചിത ദിവസങ്ങളിൽ പൊതുസ്ഥലങ്ങളിലോ ഭക്ഷണശാലകളിലോ ലഹരിവസ്തുക്കൾ വിതരണം ചെയ്യുന്നതോ ഉപയോഗിക്കുന്നതോ കർശനമായി നിരോധിച്ചിട്ടുണ്ട്. ഏതെങ്കിലും മണ്ഡലങ്ങളിലോ പോളിങ് ബൂത്തുകളിലോ റീപോളിങ് ആവശ്യമായി വന്നാൽ ആ മേഖലകളിൽ ആ ദിവസം പ്രത്യേകമായി ഡ്രൈ ഡേ ബാധകമായിരിക്കും.
വ്യക്തികൾ മദ്യം സംഭരിച്ചുവെക്കുന്നത് കുറ്റകരമായി കണക്കാക്കും. അയൽ സംസ്ഥാനങ്ങളിൽ നിന്നുള്ള നിയമവിരുദ്ധമായ മദ്യക്കടത്ത് തടയാൻ അതിർത്തികളിൽ പോലീസ്-എക്സൈസ് പരിശോധന ശക്തമാക്കിയിട്ടുണ്ട്. തിരഞ്ഞെടുപ്പ് ചട്ടങ്ങളും എക്സൈസ് നിയമങ്ങളും ലംഘിക്കുന്നവർക്കെതിരെ കർശന നടപടി സ്വീകരിക്കാൻ എക്സൈസ് കമ്മീഷണർക്കും പോലീസിനും സർക്കാർ നിർദ്ദേശം നൽകി. വോട്ടെടുപ്പ് സമാധാനപരമായി പൂർത്തിയാക്കുന്നതിന്റെ ഭാഗമായാണ് ഈ നടപടികൾ സ്വീകരിച്ചിരിക്കുന്നത്.
