03 March, 2026 09:27:34 AM
അയർലൻഡിൽ കാണാതായ മലയാളി യുവതിയുടെ മൃതദേഹം കണ്ടെത്തി
ഡബ്ലിൻ: അയർലൻഡിൽ കാണാതായ മലയാളി യുവതിയുടെ മൃതദേഹം ബ്രേ മേഖലയിലെ കടൽത്തീരത്ത് നിന്നും കണ്ടെത്തി. ഡബ്ലിനിലെ ചെറിവുഡിൽ ഐ ടി പ്രഫഷണലായിരുന്ന അശ്വതി രാജശേഖരനെയാണ് മരിച്ച നിലയിൽ കണ്ടെത്തിയത്. ഡബ്ലിൻ ഗ്രാഫ്റ്റൺ സ്ട്രീറ്റിലെ ഹെയ്സ് റിക്രൂട്ട്മെന്റ് ഏജൻസിയിലെ ഐ ടി ഉദ്യോഗസ്ഥയായിരുന്നു അശ്വതി.
കുറച്ചു ദിവസം മുമ്പാണ് യുവതിയെ കാണാതായത്. അശ്വതിയുടെ സുഹൃത്തുക്കളാണ് മൃതദേഹം തിരിച്ചറിഞ്ഞത്. ബെംഗുളുരുവിൽ നിന്നാണ് അശ്വതി അയർലൻഡിൽ എത്തിയത്. ജോലി സംബന്ധമായി സ്ഥലം മാറി അയർലൻഡിലെ ലെറ്റർക്കെന്നിയിൽ പോകാനിരിക്കെയായിരുന്നു അശ്വതിയുടെ മരണം. സുഹൃത്തുക്കളാണ് അശ്വതിയുടെ മൃതദേഹം തിരിച്ചറിഞ്ഞത്.
ലുവാസിലെ യാത്രയ്ക്ക് ശേഷമാണ് അശ്വതിയെ കാണാനില്ലെന്ന് കാട്ടി സുഹൃത്തുക്കൾ പരാതി നൽകിയത്. തുടർന്ന് തീരപ്രദേശങ്ങളായ ഡാൽകി, കിലനി എന്നിവിടങ്ങളിൽ കോസ്റ്റ് ഗാർഡും ഹെലിക്കോപ്റ്ററുകളും തിരച്ചിൽ നടത്തിയിരുന്നു. പിന്നാലെ ഡാൽക്കി ബീച്ചിന് സമീപം യുവതിയുടെ ബാഗും ലാപ്ടോപ്പും കണ്ടെത്തി. ഞായറാഴ്ചയാണ് ബ്രേ മേഖലയിൽ നിന്നും അശ്വതിയുടെ മൃതശരീരം കണ്ടെത്തിയത്. പോസ്റ്റ്മോർട്ടത്തിനായി മൃതദേഹം ലോക്ലിൻസ്റ്റൗൺ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.
