20 August, 2026 03:25:42 PM
കോണ്ഗ്രസ് മുന് എംപി സജ്ജന് കുമാര് അന്തരിച്ചു
ന്യൂഡല്ഹി: കോണ്ഗ്രസ് മുന് എംപി സജ്ജന് കുമാര് (80) അന്തരിച്ചു. വ്യാഴാഴ്ച ഡല്ഹിയിലെ സഫ്ദര്ജംഗ് ആശുപത്രിയിലായിരുന്നു അന്ത്യം. സിഖ് വിരുദ്ധ കലാപക്കേസില് തിഹാര് ജയിലില് തടവുശിക്ഷ അനുഭവിക്കുകയായിരുന്നു. അതിനിടെ ആരോഗ്യനില വഷളായതിനെ തുടര്ന്ന് ആശുപത്രിയില് പ്രവേശിപ്പിച്ചെങ്കിലും ജീവന് രക്ഷിക്കാനായില്ല. മുന് പ്രധാനമന്ത്രി ഇന്ദിരാഗാന്ധിയുടെ വധത്തെ തുടര്ന്ന് 1984 നവംബറില് പാലം കോളനി പ്രദേശത്തുണ്ടായ കലാപത്തിനിടയില് അഞ്ച് പേരുടെ മരണത്തിന് കാരണക്കാരനാണെന്ന് കണ്ടെത്തിയതിനെ തുടര്ന്നാണ് 2018 ഡിസംബര് 17ന് ഡല്ഹി ഹൈക്കോടതി സജ്ജന് കുമാറിന് ജീവപര്യന്തം തടവ് ശിക്ഷ വിധിച്ചത്. കലാപത്തിനിടെ രണ്ടു സിഖുകാര് കൊല്ലപ്പെട്ട കേസില് 2025 ഫെബ്രുവരിയില് ഡല്ഹി കോടതിയും സജ്ജന്കുമാറിന് ജീവപര്യന്തം തടവുശിക്ഷ വിധിച്ചിരുന്നു. അതേസമയം ജനക്പുരി, വികാസ് പുരി എന്നിവിടങ്ങളില് അക്രമത്തിന് പ്രേരണ നല്കിയെന്ന കേസുകളില് സജ്ജന്കുമാറിനെ കോടതി വെറുതെ വിട്ടിരുന്നു.
