14 July, 2026 12:14:27 PM
അടൂരില് യുവതി മരിച്ച നിലയിൽ; ആണ്സുഹൃത്ത് കസ്റ്റഡിയില്
പത്തനംതിട്ട: അടൂരില് യുവതിയെ വീടിനുള്ളില് തൂങ്ങിമരിച്ച നിലയില് കണ്ടെത്തി. അടൂര് കോട്ടമുകള് സ്വദേശിനി ഷെഹന (31) ആണ് മരിച്ചത്. കോവണിപ്പടിയില് ഷാളില് തൂങ്ങിമരിച്ച നിലയിലാണ് യുവതിയെ കണ്ടെത്തിയത്. സംഭവത്തില് ഏഴംകുളം സ്വദേശിയായ ആണ് സുഹൃത്തിനെ പൊലീസ് കസ്റ്റഡിയിലെടുത്തു. ഭര്ത്താവുമായി അകന്ന് കഴിയുകയായിരുന്നു യുവതി. സംഭവ സമയത്ത് ആണ് സുഹൃത്ത് വീട്ടില് ഉണ്ടായിരുന്നു.
ഇന്നലെ രാത്രി ഏഴുമണിയോടെയായിരുന്നു സംഭവം. ഷെഹനയുടെ വീട്ടില് നിന്നും ബഹളം കേട്ടതിനെതുടര്ന്ന് നാട്ടുകാര് അടൂര് നഗരസഭ കൗണ്സിലറെ അറിയിക്കുകയായിരുന്നു. പിന്നാലെ സംഭവ സ്ഥലത്തെത്തിയ കൗണ്സിലര് വീടിനുള്ളിലുണ്ടായിരുന്ന ആണ് സുഹൃത്തിനോട് കതക് തുറക്കാന് ആവശ്യപ്പെടുകയും വീടിനുള്ളില് യുവതിയെ മരിച്ച നിലയില് കണ്ടെത്തുകയുമായിരുന്നു.
ഉടന്തന്നെ അടൂര് പൊലീസിനെ വിവരം അറിയിക്കുകയായിരുന്നു. സംഭവസ്ഥലത്തെത്തിയ പൊലീസ് യുവാവിനെ കസ്റ്റഡിയിലെടുത്തു. മരിച്ച ഷെഹനയുടെയും യുവാവിന്റെയും ശരീരത്തില് രക്തപാടുകള് കണ്ടെത്തിയിട്ടുണ്ട്. ശാസ്ത്രീയ പരിശോധനയ്ക്ക് ശേഷം മാത്രമേ കൂടുതല് വിവരങ്ങള് പറയാനാകൂവെന്ന് പൊലീസ് പറഞ്ഞു.
ഷെഹനയുടേത് കൊലപാതകമാണെന്ന് കുടുംബം ആരോപിച്ചു. ഒരു കുട്ടിയുള്ള അവള് അതു ചെയ്യില്ലെന്നും ഷെഹനയുടെ അമ്മ പറയുന്നു. സംഭവത്തില് ദുരൂഹതയുണ്ടെന്നും പോസ്റ്റ്മോര്ട്ടത്തിനുശേഷമേ മരണകാരണം വ്യക്തമാകൂവെന്നും പത്തനംതിട്ട ജില്ലാ പൊലീസ് മേധാവി പറഞ്ഞു. വീട്ടില് വഴക്കുകളുണ്ടായതായി കണ്ടെത്തിയിട്ടുണ്ട്. കസ്റ്റഡിയിലെടുത്ത യുവാവിനെ ചോദ്യം ചെയ്തു വരികയാണ്. അന്വേഷണം പുരോഗമിക്കുകയാണെന്നും എസ് പി വ്യക്തമാക്കി.
