07 July, 2026 04:19:23 PM
പാലക്കാട് പ്രിയദര്ശിനി ബസില് നിന്നും വീണ് കണ്ടക്ടര്ക്ക് പരിക്ക്
പാലക്കാട്: കെഎസ്ആര്ടിസി പ്രിയദര്ശനി ബസില് നിന്നും തെറിച്ചുവീണ് കണ്ടക്ടര്ക്ക് പരിക്ക്. ആലത്തൂര് വാനൂര് സ്വദേശി മുഹമ്മദിനാണ് പരിക്കേറ്റത്. ചൊവ്വാഴ്ച രാവിലെ 9 മണിയോടെയായിരുന്നു സംഭവം. ഒറ്റപ്പാലത്ത് നിന്നും വടക്കഞ്ചേരി വഴി പാണ്ടാംകോടേക്ക് സര്വീസ് നടത്തുന്ന ബസിലെ കണ്ടക്ടർക്കാണ് അപകടമുണ്ടായത്. ബസ് ആയക്കാട് മന്നത്ത് എത്തിയപ്പോള് ഡോര് തുറന്ന് മുഹമ്മദ് പുറത്തേക്ക് തെറിച്ചു വീഴുകയായിരുന്നു. സംഭവ സമയം ബസില് ഏകദേശം 130 അധികം യാത്രക്കാര് ഉണ്ടായിരുന്നുവെന്നാണ് വിവരം.
തിരക്ക് മൂലം ആയക്കോട് സ്റ്റോപ്പില് ബസ് നിര്ത്തിയിരുന്നില്ല. ഈ സ്റ്റോപ്പില് നിന്നും ഇരുപത് അടിമാറിയാണ് മുഹമ്മദ് വീണത്. പരിക്കേറ്റ മുഹമ്മദിനെ ഇരട്ടക്കുളം സ്വകാര്യ ആശുപത്രിയില് പ്രവേശിപ്പിച്ചു. ഇതിന് തൊട്ടുമുന്പിലുള്ള പുളിങ്കുട്ടം ബസ്റ്റോപ്പില് നിന്നും കണ്ടക്ടര് മുന്വശത്തെ ഡോറിലൂടെ ഇറങ്ങി പുറകുവശത്ത് കയറി ഡോര് അടച്ചതാണെന്ന് യാത്രക്കാർ പറയുന്നു. തിരക്ക് മൂലം ഡോര് അറിയാതെ തുറന്നതാവാം കണ്ടക്ടര് താഴെ വീഴാന് കാരണമെന്നാണ് പ്രാഥമിക നിഗമനം.
