24 May, 2025 12:56:16 PM
ഭാര്യ പിണങ്ങിപ്പോയി; ഭര്‍ത്താവ് കല്യാണ ബ്രോക്കറെ കുത്തിക്കൊന്നു
മംഗളൂരു: ഭാര്യ പിണങ്ങിപ്പോയതിന് ഭര്‍ത്താവ് കല്യാണ ബ്രോക്കറെ കുത്തിക്കൊന്നു. മംഗളൂരുവില്‍ വ്യാഴാഴ്ച രാത്രിയാണ് സംഭവം. മുസ്തഫ (30) എന്നയാളാണ് ഇവരുടെ വിവാഹത്തിന് ബ്രോക്കറായിരുന്ന സുലൈമാനെ (50) കുത്തിക്കൊലപ്പെടുത്തിയത്. സുലൈമാന്റെ മക്കളായ റിയാബ്, സിയാബ് എന്നിവർക്കും മുസ്തഫയുടെ ആക്രമണത്തില്‍ പരിക്കേറ്റു. പ്രതിയെ പോലീസ് അറസ്റ്റു ചെയ്തു. മരിച്ച സുലൈമാന്‍ കല്യാണ ബ്രോക്കറായി പ്രവര്‍ത്തിച്ചു വരികയായിരുന്നുവെന്ന് പ്രാഥമിക അന്വേഷണത്തില്‍ കണ്ടെത്തി.
ഏകദേശം എട്ട് മാസം മുമ്പായിരുന്നു മുസ്തഫയുടെ വിവാഹം. എന്നാല്‍, ദാമ്പത്യജീവിതത്തില്‍ പൊരുത്തക്കേട് ഉണ്ടായതിനെ തുടര്‍ന്ന് രണ്ട് മാസം മുമ്പ് മുസ്തഫയുടെ ഭാര്യ സ്വന്തം വീട്ടിലേക്ക് മടങ്ങി. തുടര്‍ന്ന് മുസ്തഫയും സുലൈമാനും തമ്മിലുള്ള ബന്ധം മോശമായി. വ്യാഴാഴ്ച രാത്രി മുസ്തഫ സുലൈമാനെ ഫോണില്‍ ബന്ധപ്പെടുകയും അധിക്ഷേപിച്ച് സംസാരിക്കുകയും ചെയ്തു. തുടര്‍ന്ന് സുലൈമാന്‍ തന്റെ മക്കളായ റിയാബിനും സിയാബിനുമൊപ്പം മുസ്തഫയുടെ വീട്ടില്‍ പോയി വിഷയത്തില്‍ ചര്‍ച്ച നടത്തി.
