07 June, 2026 06:47:17 PM
ശക്തമായ കാറ്റ്; തണ്ണിത്തോട് സ്കൂൾ കെട്ടിടത്തിന്റെ മേൽക്കൂര പറന്നുപോയി
പത്തനംതിട്ട: കനത്ത മഴയിലും കാറ്റിലും സ്കൂളിന്റെ മേൽക്കൂര തകർന്നു. പത്തനംതിട്ട തണ്ണിത്തോട് സെന്റ് ബെനഡിക്സ് എം.എസ്.സി സ്കൂളിന്റെ മേൽക്കൂരയാണ് തകർന്നത്. ശക്തമായ കാറ്റിൽ സമീപത്തെ വീട്ടിലേക്കും മേൽക്കൂര പതിച്ചു. രാവിലെ മുതൽ ജില്ലയുടെ മലയോര മേഖലയിൽ മഴ പെയ്തിരുന്നു. ഉച്ചയോടെ മിന്നൽ ചുഴലി ഉണ്ടായ സമയത്താണ് സ്കൂൾ കെട്ടിടത്തിന്റെ മേൽക്കൂര തകർന്നത്. പത്താം ക്ലാസിന്റെ 3 ഡിവിഷനും സ്റ്റാഫ് റൂമും പ്രവർത്തിക്കുന്ന കെട്ടിടത്തിന്റെ മേൽക്കൂര പൂർണമായും തകർന്നു . ശക്തമായ കാറ്റിൽ സമീപത്തെ വീട്ടിലേക്കും സ്കൂളിന്റെ മേൽക്കൂര പതിച്ചു. അവധി ദിവസമായതിനാൽ സ്കൂളിൽ വിദ്യാർഥികളോ അധ്യാപകരോ അനധ്യാപകരോ ഉണ്ടായിരുന്നില്ല. സ്കൂളിന് ഫിറ്റ്നസ് സർട്ടിഫിക്കറ്റ് ഉണ്ടായിരുന്നു. 2018- ൽ സ്കൂളിൻ്റെ മേൽക്കൂര മാറുകയും മറ്റ് നവീകരണ പ്രവർത്തികൾ നടത്തുകയും ചെയ്തിരുന്നതായി പിടിഎ ഭാരവാഹികൾ പറഞ്ഞു.
