13 May, 2026 04:22:40 PM
കളമശേരിയിൽ ലോറിയും സ്കൂട്ടറും കൂട്ടിയിടിച്ച് അപകടം; ആറ് വയസുകാരൻ മരിച്ചു
കൊച്ചി: കളമശേരിയിലുണ്ടായ വാഹനാപകടത്തിൽ ആറ് വയസുകാരൻ മരിച്ചു. കുട്ടിയുടെ പേരുവിവരങ്ങൾ ലഭ്യമായിട്ടില്ല. ഇന്ന് ഉച്ചയ്ക്ക് ഒന്നേകാലോടെ ദേശീയപാതയിൽ കളമശേരിയിലെ അപ്പോളോ ടയേഴ്സിന് മുൻവശത്തുവച്ചാണ് സംഭവം. ഗ്യാസ് സിലിണ്ടറുമായി പോയ ലോറി സ്കൂട്ടറിൽ ഇടിച്ചതിനെ തുടർന്ന് സമീപത്തുകൂടി പോയ കെഎസ്ആർടിസി ബസിന് അടിയിലേക്ക് കുട്ടി തെറിച്ചുവീഴുകയായിരുന്നു. സംഭവസ്ഥലത്തുവച്ച് തന്നെ കുട്ടി മരിച്ചു. മുത്തച്ഛന്റെയും മുത്തശ്ശിയുടെയും കൂടെ ബന്ധുവീട്ടിലേക്ക് പോകുന്നതിനിടെയാണ് അപകടം. ഇവരുടെ പരിക്ക് സാരമുള്ളതല്ലെന്നാണ് വിവരം.
