07 May, 2026 09:02:33 PM
മൂവാറ്റുപുഴയില് മാത്യു കുഴൽനാടനെതിരെ മുസ്ലിം ലീഗിന്റെ പ്രതിഷേധം; ഫ്ലക്സിൽ നിന്ന് ചിത്രം വെട്ടിമാറ്റി
മൂവാറ്റുപുഴ: മൂവാറ്റുപുഴയില് മാത്യു കുഴല്നാടനെതിരെ മുസ്ലീം ലീഗിന്റെ പ്രതിഷേധം. ഫ്ളക്സില് നിന്നും മാത്യുകുഴല്നാടന്റെ ചിത്രം വെട്ടിമാറ്റി. ഫ്ളക്സ് കത്തിച്ചും പ്രതിഷേധിച്ചു. ഫ്ളക്സ് ബോര്ഡില് കുഴല്നാടനെ കൂടാതെ രമേശ് ചെന്നിത്തലയുടേയും വി ഡി സതീശന്റെയും ചിത്രങ്ങളുണ്ടായിരുന്നു. ഇവര് ഇനി നാടുനയിക്കട്ടെ എന്നായിരുന്നു ബോര്ഡിലുണ്ടായിരുന്നത്. ഇതില് നിന്ന് മാത്യു കുഴല്നാടന്റെ ചിത്രം വെട്ടിമാറ്റിയായിരുന്നു പ്രതിഷേധം.
കണ്ണൂര് ഇരിക്കൂറിലല് മാത്യു കുഴല്നാടനെതിരെ മുസ്ലീം യൂത്ത് ലീഗിന്റെ ഫ്ളക്സ് ബോര്ഡ് സ്ഥാപിച്ചിരുന്നു. ഫ്ളക്സില് മാത്യു കുഴല്നാടനെതിരെ രൂക്ഷ വിമര്ശനമാണുണ്ടായിരുന്നത്. 'കുഴല്നാടാ നിന്റെ കുഴലൂത്ത് ലീഗിനെതിരെ വേണ്ടെ'ന്ന് ഫ്ലക്സില് പറയുന്നു. 'പട നയിച്ചവര് ഭരിക്കട്ടെ' എന്നും ബോര്ഡില് പറയുന്നു.
കോണ്ഗ്രസ് മുഖ്യമന്ത്രി ചര്ച്ചയില് വി ഡി സതീശനെ പിന്തുണച്ചതില് മുസ്ലിം ലീഗിനെതിരെ മാത്യു കുഴല്നാടന് രംഗത്തെത്തിയിരുന്നു. ഇതിന് പിന്നാലെയാണ് ലീഗ് പ്രതിഷേധം കടുപ്പിക്കുന്നത്. മുസ്ലിം ലീഗിന്റെ ആഭ്യന്തര കാര്യങ്ങളില് കോണ്ഗ്രസ് ഇടപെടാറില്ല. തിരിച്ചും അങ്ങനെയാകണമെന്ന് മാത്യു കുഴല്നാടന് മാധ്യമങ്ങളോട് പ്രതികരിച്ചിരുന്നു. രാഷ്ട്രീയമായി മുസ്ലിം ലീഗിന് എപ്പോഴൊക്കെ ആക്രമിച്ചിട്ടുണ്ടോ അപ്പോഴൊക്കെ കോണ്ഗ്രസ് ഒപ്പം ഉണ്ടായിരുന്നു. പരസ്പര ധാരണയോടുകൂടി മുന്നോട്ട് പോകണമെന്നും മാത്യു കുഴല്നാടന് പറഞ്ഞു.
