29 November, 2025 02:22:12 PM
ഫ്ലക്സോ പോസ്റ്ററോ ഒന്നുമില്ലാതെ പരിസ്ഥിതി സൗഹൃദ മത്സരവുമായി ഒരു സ്ഥാനാര്‍ഥി
കോട്ടയം: ഫ്ലക്സോ പോസ്റ്ററോ ബോര്‍ഡോ ഒന്നുമില്ലാതെ പരിസ്ഥിതി സൗഹൃദമത്സരവുമായി കോട്ടയത്ത് ഒരു സ്ഥാനാര്‍ഥി. കോട്ടയം നഗരസഭാ 35-ാം വാര്‍ഡില്‍ (മറിയപ്പള്ളി) നിന്നും ജനവിധി തേടുന്ന ബിജെപി സ്ഥാനാര്‍ഥി ശങ്കരന്‍ ആണ് കേരളത്തിനാകമാനം മാതൃകയായി മാറുന്നത്. നഗരസഭയിലേക്ക് മത്സരിക്കുന്ന ഒരു സ്ഥാനാര്‍ഥിക്ക് 75000 രൂപ വരെ പ്രചരണത്തിനായി ചെലവഴിക്കാന്‍ അനുമതിയുണ്ട്. എന്നാല്‍ താന്‍ ആര്‍ഭാടത്തിനൊന്നും ഒരുങ്ങുന്നില്ലെന്നും ഇതിലൂടെ ലാഭിക്കുന്ന തുക ജീവകാരുണ്യപ്രവര്‍ത്തനത്തിന് ഉപയോഗിക്കാനാണ് ഉദ്ദേശിക്കുന്നതെന്നും ശങ്കരന്‍ പറയുന്നു.
നാട്ടകം മറിയപ്പള്ളി സ്വദേശിയായ ശങ്കരന്‍ യോഗാ പരിശീലകന്‍ കൂടിയാണ്. 2005 - 2010 കാലഘട്ടത്തിലാണ് ആദ്യം ജനപ്രതിനിധിയാകുന്നത്. അന്ന് നാട്ടകം ഗ്രാമപഞ്ചായത്തില്‍ വികസനകാര്യസ്ഥിരം സമിതി അധ്യക്ഷനായിരുന്നു. 2015ലെ തിരഞ്ഞെടുപ്പില്‍ കോട്ടയം നഗരസഭയിലേക്ക് ജയിച്ചുവന്നു. 2020 ല്‍ 41-ാം വാര്‍ഡില്‍നിന്നും വീണ്ടും ജയിച്ച ശങ്കരന്‍ നഗരസഭയില്‍ വിദ്യാഭ്യാസ സ്ഥിരം സമിതി അധ്യക്ഷനായിരുന്നു. 41-ാം വാര്‍ഡ് വനിതാസംവരണമായതിനെ തുടര്‍ന്നാണ് ഇപ്പോള്‍ 35-ാം വാര്‍ഡില്‍ നിന്നും ജനവിധി തേടുന്നത്.
ഒരു ഫ്ലക്സ് ബോര്‍ഡിന് 1000 രൂപയാണ് ഏറ്റവും കുറഞ്ഞ നിര്‍മാണചെലവ്. ഇത്തരം 50 ബോര്‍ഡുകളെങ്കിലും വേണം വാര്‍ഡില്‍ സ്ഥാപിക്കാന്‍. അപ്പോള്‍തന്നെ 50,0000 രൂപയായി. പിന്നെ ഇവ സ്ഥാപിക്കുന്നതിനുള്ള മറ്റ് ചെലവുകള്‍ കൂടിയാകുമ്പോള്‍ തിരഞ്ഞെടുപ്പ് കമ്മീഷന്‍ അനുവദിച്ച ചെലവ് പരിധി 75,000 രൂപ എന്നതിനപ്പുറമാകും. ബാനര്‍, ചുവരെഴുത്ത്, നോട്ടീസ്, മൈക്ക് അനൌണ്‍സ്മെന്‍റ് ഇവയെല്ലാം മറ്റ് സ്ഥാനാര്‍ഥികളെ പോലെ നടത്താന്‍പോയാല്‍ ലക്ഷങ്ങളാകും ചെലവ് എന്നു ഉത്തമബോധ്യമുള്ള ശങ്കരന്‍ ഇവയെല്ലാം മാറ്റിവെച്ച് ഗൃഹസമ്പര്‍ക്കത്തിലൂടെ തന്‍റെ നാട്ടുകാരുടെ പിന്തുണ ഉറപ്പാക്കുകയാണ്.
