11 July, 2026 04:57:23 PM
പുതുവൈപ്പില് വള്ളം മറിഞ്ഞ് രണ്ട് മത്സ്യത്തൊഴിലാളികള് മരിച്ചു; മൂന്ന് പേര് രക്ഷപ്പെട്ടു
കൊച്ചി: കൊച്ചി പുതുവൈപ്പില് മത്സ്യബന്ധന വള്ളം തലകീഴായി മറിഞ്ഞ് രണ്ട് മത്സ്യത്തൊഴിലാളികള് മരിച്ചു. പുതുവൈപ്പ് സ്വദേശികളായ ദേവസി, ബാബു എന്നിവരാണ് അപകടത്തില് ജീവന് വെടിഞ്ഞത്. ശനിയാഴ്ച പുലര്ച്ചെ പുതുവൈപ്പില് നിന്നും മത്സ്യബന്ധനത്തിനായി കടലിലേക്ക് പോയ വള്ളമാണ് അപകടത്തില്പ്പെട്ടത്.
കടലിലെ ശക്തമായ തിരമാലയില്പ്പെട്ട് വള്ളം തലകീഴായി മറിയുകയായിരുന്നു. ഉടന് തന്നെ കടലിലുണ്ടായിരുന്ന മറ്റു തൊഴിലാളികളുടെയും പ്രാദേശികവാസികളുടെയും നേതൃത്വത്തില് ഇരുവരെയും കരയ്ക്കെത്തിച്ച് ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. മരിച്ച ദേവസിയുടെയും ബാബുവിന്റെയും മൃതദേഹങ്ങള് എറണാകുളം ജനറല് ആശുപത്രി മോര്ച്ചറിയിലേക്ക് മാറ്റി.
അപകടത്തില്പ്പെട്ട വള്ളത്തില് ആകെ അഞ്ച് മത്സ്യത്തൊഴിലാളികളാണ് ഉണ്ടായിരുന്നത്. ഇതില് പരിക്കേറ്റ ഒരാളെ എറണാകുളം ജനറല് ആശുപത്രിയില് പ്രവേശിപ്പിച്ചു. ഇയാള് നിലവില് ചികിത്സയിലാണ്. ഒപ്പമുണ്ടായിരുന്ന മറ്റ് രണ്ടു പേര് നിസ്സാര പരിക്കുകളോടെ രക്ഷപ്പെട്ടു. ഇവരുടെ ആരോഗ്യനില തൃപ്തികരമാണെന്ന് ആശുപത്രി അധികൃതര് അറിയിച്ചു. പോസ്റ്റ്മോര്ട്ടം നടപടികള്ക്ക് ശേഷം മൃതദേഹങ്ങള് ബന്ധുക്കള്ക്ക് വിട്ടുനല്കും. സംഭവത്തില് പോലീസ് അന്വേഷണം ആരംഭിച്ചിട്ടുണ്ട്.
