23 May, 2026 08:48:09 PM
ധീരജ് വധക്കേസ് പ്രതി നിഖില് പൈലിയെ ഇടുക്കി ഡിസിസി അംഗമാക്കാന് നീക്കം
ഇടുക്കി: ധീരജ് വധക്കേസ് പ്രതി നിഖിൽ പൈലിയെ ഡിസിസി അംഗമാക്കാൻ നീക്കം. ഡിസിസി പ്രസിഡൻ്റ് സി പി മാത്യുവാണ് നിഖിൽ പൈലിയടക്കം അഞ്ചുപേരെ നാമനിർദ്ദേശം ചെയ്തത്. മജോ കാരിമുട്ടം, ജോയി വടക്കേടം, വർക്കി ആലയ്ക്കാപ്പറമ്പിൽ, ജോർജ് ജോസഫ് എന്നിവരെയാണ് നിഖിൽ പൈലിക്ക് പുറമേ നാമനിർദ്ദേശം ചെയ്തത്. ഇടുക്കി എൻജിനീയറിങ് കോളേജിലെ വിദ്യാർത്ഥിയും എസ്എഫ്ഐ പ്രവർത്തകനുമായിരുന്ന ധീരജ് രാജേന്ദ്രനെ കൊലപ്പെടുത്തിയ കേസിൽ ഒന്നാം പ്രതിയാണ് നിഖിൽ പൈലി.
ഡിസിസി അംഗമായി നാമനിർദ്ദേശം ചെയ്തതിൽ നന്ദി അറിയിച്ച് നിഖിൽ പൈലി ഫേസ്ബുക്ക് പോസ്റ്റും പങ്കുവെച്ചിട്ടുണ്ട്. കെപിസിസി പ്രസിഡൻ്റ്, മുൻ കെപിസിസി പ്രസിഡന്റ് കെ സുധാകരൻ, ഡിസിസി പ്രസിഡൻ്റ് സി പി മാത്യു എന്നിവർക്ക് നന്ദി പറഞ്ഞുകൊണ്ടാണ് നിഖിൽ പൈലി കുറിപ്പ് പങ്കുവെച്ചത്. അതേസമയം, തന്റെ നിലപാടിൽ തെറ്റില്ല എന്നാണ് ഡിസിസി പ്രസിഡൻ്റ് സി പി മാത്യു പറയുന്നത്. ധീരജിനെ കുത്തിയ കത്തി ഇതുവരെ കണ്ടെത്താൻ കഴിഞ്ഞിട്ടില്ലല്ലോ എന്ന മറുചോദ്യവും ഡിസിസി പ്രസിഡന്റ് ചോദിക്കുന്നുണ്ട്.
