17 April, 2026 12:13:07 PM
ലൈംഗിക പീഡനക്കേസ്; കോണ്ഗ്രസ് കൗണ്സിലര് പ്രശോഭിന്റെ മുന്കൂര് ജാമ്യാപേക്ഷ തള്ളി
പാലക്കാട്: ലൈംഗിക പീഡനകേസില് പാലക്കാട്ടെ കോണ്ഗ്രസ് കൗണ്സിലര് പ്രശോഭ് സി വത്സന്റെ മുന്കൂര് ജാമ്യാപേക്ഷ തള്ളി. മണ്ണാര്ക്കാട് എസ് സി/എസ്ടി പ്രത്യേക കോടതിയാണ് ജാമ്യാപേക്ഷ തള്ളിയത്. കഴിഞ്ഞ ദിവസം അതിജീവിത കോടതിയില് നേരിട്ടെത്തി മൊഴി നല്കിയിരുന്നു.
ജോലി വാഗ്ദാനം ചെയ്ത് പരിചയപ്പെട്ട ശേഷം സൗഹൃദം നടിച്ച് താമസസ്ഥലത്തേക്ക് അതിക്രമിച്ചു കയറി, പ്രശോഭ് ലൈംഗികമായി പീഡിപ്പിച്ചു എന്നായിരുന്നു മുഖ്യമന്ത്രിക്ക് അതിജീവിത നല്കിയ പരാതി. ജില്ലാ പോലീസ് മേധാവിയുടെ നിര്ദ്ദേശപ്രകാരം പാലക്കാട് ടൗണ് സൗത്ത് പോലീസ് കേസ് രജിസ്റ്റര് ചെയ്തതോടെ പ്രശോഭ് ഒളിവിലാണ്.
പ്രതിയെ പിടികൂടാന് പൊലീസ് വ്യാപക അന്വേഷണം നടത്തുന്നതിനിടെ പാലക്കാട്ടെ ഒരു അഭിഭാഷകന് മുഖേന മണ്ണാര്ക്കാട് എസ് സി/എസ് ടി പ്രത്യേക കോടതിയില് പ്രശോഭ് മുന്കൂര് ജാമ്യാപേക്ഷ നല്കുകയായിരുന്നു. നിരപരാധിയാണെന്നും, ജാമ്യം ലഭിച്ചാല് അന്വേഷണത്തോട് സഹകരിക്കാമെന്നുമാണ് പ്രശോഭ് മുന്കൂര് ജാമ്യ അപേക്ഷയിലൂടെ കോടതിയെ അറിയിച്ചത്.
