24 September, 2026 12:05:20 PM
കണ്ണൂരിൽ മദ്യലഹരിയിൽ പൊലീസുകാരൻ ഓടിച്ച കാർ ഇടിച്ച് മൂന്നു പേർക്ക് പരിക്ക്
കണ്ണൂർ: പോലീസുകാരൻ മദ്യപിച്ച് ഓടിച്ച വാഹനമിടിച്ച് മൂന്ന് പേർക്ക് പരിക്കേറ്റു. അഴീക്കൽ കോസ്റ്റൽ പോലീസ് സ്റ്റേഷനിലെ എസ്.ഐ രജിത്ത് ആണ് വാഹനമോടിച്ചത്. 21നായിരുന്നു സംഭവം. ദേശീയപാതയിൽ കണ്ണോത്തുംചാൽ ഭാഗത്തുവെച്ചാണ് അപകടമുണ്ടായത്. ഹോട്ടൽ മാനേജ്മെന്റ് വിദ്യാർഥിനിയും പാർട് ടൈം ജോലിക്കാരിയുമായ സ്വാതി എന്ന യുവതിക്കും ഇതരസംസ്ഥാനതൊഴിലാളികളായ രണ്ടുപേർക്കുമാണ് പരിക്കേറ്റത്.
അപകടത്തെ തുടർന്ന് എസ്.ഐ രജിത്തിനെ സസ്പെൻഡ് ചെയ്തു. നേരത്തെയും മദ്യപിച്ച് വാഹനമോടിച്ച സംഭവങ്ങൾ രജിത്തിന്റെ ഭാഗത്തുനിന്നുണ്ടായിട്ടുണ്ട്. ജോലി സ്ഥലത്ത് നിന്ന് തിരിച്ചുവരുന്നതിനിടെയാണ് സ്വാതിയെ കാർ വന്നിടിച്ചത്. തൊഴിലാളികളെ ഇടിച്ചതിനു ശേഷമായിരുന്നു സ്വാതിയെ കാറിടിച്ചത്. വാഹനമിടിച്ചിട്ടത് കണ്ടിട്ടും പോലീസുകാരൻ വാഹനം നിർത്താതെ പോയെന്നും സമീപത്തെ കടയിലുണ്ടായിരുന്നവർ ഓടിച്ച് പിടിക്കുകയായിരുന്നുവെന്നും പരിക്കേറ്റവർ പറഞ്ഞു. നടന്നുപോകാൻ കഴിയാത്ത സ്ഥിതിയിലായിരുന്നു പോലീസുകാരനെന്ന് സ്വാതി പറഞ്ഞു.
