21 August, 2025 11:49:05 AM
കാടാമ്പുഴ ഭഗവതി ക്ഷേത്രത്തിൽ വിവിധ പദ്ധതികളുടെ നിർമാണ ഉദ്ഘാടനം 22 ന്
കാടാമ്പുഴ: കാടാമ്പുഴ ഭഗവതി ക്ഷേത്രത്തിൽ പുതുതായി ആരംഭിക്കുന്ന വിവിധ പദ്ധതികളുടെ നിർമാണ ഉദ്ഘാടനം വെള്ളിയാഴ്ച വൈകിട്ട് 6 മണിക്ക് ദേവസ്വം വകുപ്പ് മന്ത്രി വി എൻ വാസവൻ നിർവഹിക്കും. മലബാർ ദേവസ്വം ബോർഡ് പ്രസിഡന്റ് ഒ കെ വാസു അധ്യക്ഷനാകും. ക്ഷേത്രം തന്ത്രി അണ്ടലാടിമന ഉണ്ണി നമ്പൂതിരിപ്പാട്, ക്ഷേത്രം മേൽശാന്തി പുതുമന മഠം ഹരിദാസ് എമ്പ്രാന്തിരി എന്നിവർ ഭദ്രദീപം തെളിയിക്കും.
മലബാർ ദേവസ്വം ബോർഡ് കമ്മീഷണർ ടി സി ബിജു മുഖ്യാതിഥിയായി പങ്കെടുക്കും. മലബാർ ദേവസ്വം ബോർഡ് മെമ്പർമാരായ കെ സുധാകുമാരി, പ്രജീഷ് തിരുത്തിയിൽ, കെ എൻ ഉദയൻ, മാഠാക്കര പഞ്ചായത്ത്‌ പ്രസിഡന്റ് ഷെരീഫ ബഷീർ, ദേവസ്വം ഡെപ്യൂട്ടി കമ്മിഷണർ പി ടി വിജയി, അസി കമ്മിഷണർ കെ കെ പ്രമോദ് കുമാർ, ക്ഷേമനിധി സെക്രട്ടറി ടി ബിനേഷ് കുമാർ, വാർഡ് മെമ്പർ നിമിഷ പ്രദീപ്, കെ ഉണ്ണികൃഷ്ണൻ എന്നിവർ പ്രസംഗിക്കും.
ശ്രീകോവിൽ, ചുറ്റമ്പലം, പ്രദക്ഷിണ വഴി, ചോറൂണ് മണ്ഡപം, നടവഴി, ഗോപുരം തുടങ്ങിയവ ക്ഷേത്രചാരുത നഷ്ടപ്പെടാതെ തച്ചുശാസ്ത്രവിധികൾ പൂർണമായും ഉൾക്കൊണ്ട് പൂർത്തിയാക്കി. നവരാത്രി മണ്ഡപത്തിന്റെ നിർമാണം അവസാന ഘട്ടത്തിലാണ്.
ദക്ഷിണേന്ത്യയിലെ പ്രസിദ്ധ ക്ഷേത്രമായ കാടാമ്പുഴ ഭഗവതി ക്ഷേത്രത്തിൽ ആയിരക്കണക്കിന് ഭക്തരാണ് ദിനം പ്രതി ദർശന പുണ്യം തേടിയെത്തുന്നത്. ക്ഷേത്രത്തിലെ പ്രധാന വഴിപാടായ മുട്ടറുക്കലിന് വേണ്ടി ഭക്തജനങ്ങൾ മണിക്കൂറുകൾ കാത്തുനിൽക്കുന്ന വളരെ ക്ലേശകരമായ സാഹചര്യം ഒഴിവാക്കുന്നതിനാണ് ക്ഷേത്രപരിസരത്ത് എല്ലാവിധ ആധുനിക സൗകര്യങ്ങളോടും കൂടി ക്യൂ കോംപ്ലക്സും അതോടൊപ്പം പ്രദക്ഷിണവഴിയിൽ നടപന്തലുകളും തുലാഭാര മണ്ഡപവും നിർമിക്കുന്നത്.
മലബാർ ദേവസ്വം ബോർഡിന് കീഴിലുള്ള ക്ഷേത്രത്തിലെത്തുന്ന ഭക്തജനങ്ങൾക്ക് ആവശ്യമായ സൗകര്യം ഒരുക്കുന്നതിന് വേണ്ടി ഒരു വർഷം മുൻപ് ദേവസ്വം മന്ത്രി വി എൻ വാസവൻ പ്രഖ്യാപിച്ച വികസന പദ്ധതികളുടെ തുടർപ്രവർത്തനങ്ങൾക്കാണ് നാളെ തുടക്കം കുറിക്കുന്നത്.
