05 December, 2025 01:00:41 PM
ബലാത്സംഗക്കേസ്; മുന്കൂര്ജാമ്യം തേടി രാഹുല് ഹൈക്കോടതിയില്
കൊച്ചി: ബലാത്സംഗക്കേസില് രാഹുല് മാങ്കൂട്ടത്തില് എംഎല്എ മുന്കൂര് ജാമ്യം തേടി ഹൈക്കോടതിയെ സമീപിച്ചു. ക്രിമിനല് അഭിഭാഷകന് എസ് രാജീവാണ് രാഹുലിന് വേണ്ടി ഹര്ജി നല്കിയിട്ടുള്ളത്. ഉഭയകക്ഷി സമ്മതപ്രകാരമുള്ള ബന്ധമാണ് താനും പരാതിക്കാരിയും തമ്മിലുണ്ടായിരുന്നതെന്നാണ് രാഹുല് ജാമ്യാപേക്ഷയില് വ്യക്തമാക്കുന്നതെന്നാണ് സൂചന. യുവതിയെ ബലാത്സംഗം ചെയ്തിട്ടില്ലെന്നും രാഹുല് ഹര്ജിയില് പറയുന്നു.
യുവതിയെ ഗര്ഭച്ഛിദ്രത്തിന് താന് നിര്ബന്ധിച്ചിട്ടില്ല. തനിക്കെതിരായ പരാതി സിപിഎം-ബിജെപി ഗൂഢാലോചനയുടെ ഫലമാണെന്നും രാഹുല് മാങ്കൂട്ടത്തില് ഹര്ജിയില് ആരോപിക്കുന്നുവെന്നാണ് വിവരം. ബലാത്സംഗ കേസില് രാഹുല് മാങ്കൂട്ടത്തിലിന്റെ മുന്കൂര് ജാമ്യാപേക്ഷ കഴിഞ്ഞദിവസം തിരുവനന്തപുരം സെഷന്സ് കോടതി തള്ളിയിരുന്നു. ഇതേത്തുടര്ന്നാണ് രാഹുല് ഹൈക്കോടതിയെ സമീപിച്ചിട്ടുള്ളത്.
അതേസമയം, ഒമ്പതാം ദിവസവും രാഹുല് മാങ്കൂട്ടത്തില് ഒളിവില് തുടരുകയാണ്. രാഹുലിനെ കണ്ടെത്താന് പൊലീസ് തിരച്ചില് ഊര്ജ്ജിതമായി നടക്കുന്നുണ്ട്. രാഹുലിന്റെ ഒളിസങ്കേതം ഇനിയും കണ്ടെത്താനായിട്ടില്ല. ഒളിവു വാസത്തിനിടെ പല തവണ മൊബൈല് ഫോണും കാറും രാഹുല് മാങ്കൂട്ടത്തില് മാറി ഉപയോഗിക്കുന്നുണ്ട്.
