24 August, 2026 06:32:34 PM
നിതിൻ രാജിന്റെ മരണം; ഡോ. റാമിന്റെ അറസ്റ്റിൽ വീഴ്ചപറ്റി, ഡിവൈഎസ്പിയ്ക്ക് സസ്പെൻഷൻ
കൊച്ചി: കണ്ണൂര് അഞ്ചരരണ്ടി ഡെന്റല് കോളജിലെ ഒന്നാം വര്ഷ ബിഡിഎസ് വിദ്യാര്ഥി നിതിന് രാജ് ജീവനൊടുക്കിയ കേസില് മുഖ്യപ്രതി ഡോ. എം കെ റാമിന് രക്ഷപ്പെടാന് സാഹചര്യമൊരുക്കിയ അന്വേഷണ ഉദ്യോഗസ്ഥന് ഡിവൈഎസ്പി സുധീര് കല്ലനെ സസ്പെന്ഡ് ചെയ്തു. ആഭ്യന്തരവകുപ്പ് മന്ത്രി രമേശ് ചെന്നിത്തലയുടെ നിര്ദേശ പ്രകാരമാണ് നടപടി.
കോടതിയില് നിന്ന് ആഭ്യന്തര വകുപ്പിനും സര്ക്കാരിനും നിരന്തരം രൂക്ഷ വിമര്ശനം ഏറ്റതിന് പിന്നാലെയാണ് നടപടി.അന്വേഷണോദ്യോഗസ്ഥനായ ഡിവൈഎസ്പി സുധീര് കല്ലന് സര്വീസില് തുടരുന്നത് ആഭ്യന്തരവകുപ്പിന്റെ സമ്പൂര്ണ പരാജയമാണെന്ന് കോടതി വിമര്ശിച്ചിരുന്നു. ഡിവൈഎസ്പി ഗുരുതരവീഴ്ച വരുത്തിയെന്ന് അന്വേഷണത്തില് കണ്ടെത്തിയിട്ടും എന്തുകൊണ്ട് സംരക്ഷിക്കുന്നെന്നും ഉദ്യോഗസ്ഥനെതിരെ സ്വീകരിച്ച നടപടി അറിയിക്കാനും കോടതി നിര്ദേശിച്ചിരുന്നു.
എഡിജിപി എം.ആര് അജിത് കുമാര് അടക്കമുള്ളവരെ സസ്പെന്ഡ് ചെയ്തപ്പോള് എന്തുകൊണ്ട് സുധീറിനെതിരെ ഒരു നടപടിയും ഉണ്ടായില്ല എന്ന് കോടതി ചോദിച്ചിരുന്നു. സവര്ക്കറെ കുറിച്ച് ചോദ്യം തയ്യാറാക്കിയ അധ്യാപകനെതിരെ അപ്പോള് തന്നെ നടപടിയെടുത്തു. തിരുവനന്തപുരം കോര്പ്പറേഷനില് കത്ത് നല്കിയ ഉദ്യോഗസ്ഥയെ നിങ്ങള് സസ്പെന്ഡ് ചെയ്തു. വിജിലന്സില് പരാതി നല്കിയ എഡിജിപിയെ നിങ്ങള് ഡിജിപി ആക്കി. എഡിജിപി എം.ആര് അജിത് കുമാറിനെ ഉടനെ സസ്പെന്ഡ് ചെയ്തു. അപ്പോഴൊന്നും സംസ്ഥാന സര്ക്കാര് ചട്ടം പറഞ്ഞില്ല. പക്ഷേ ഇവിടെ വലിയ വീഴ്ച ഉണ്ടായിട്ടും നിങ്ങള് ചട്ടം പറഞ്ഞ് നടപടിയെടുക്കാതിരിക്കുകയാണ് എന്നും കോടതി രൂക്ഷമായി വിമര്ശനം ഉന്നയിച്ചിരുന്നു.
കഴിഞ്ഞ ഏപ്രില് പത്തിനാണ് നിധിന്രാജ് മെഡിക്കല് കോളജ് കെട്ടിടത്തിനുമുകളില്നിന്ന് വീണുമരിച്ചത്. ഒന്നാം പ്രതി ഡോ. റാം അന്നുമുതല് ഒളിവിലായിരുന്നു. ഏറെ സമ്മര്ദങ്ങള്ക്കൊടുവില് ക്രൈംബ്രാഞ്ച് അറസ്റ്റുചെയ്തെങ്കിലും അന്നുതന്നെ ജാമ്യംകിട്ടുന്ന അവസ്ഥയും പൊലീസ് സൃഷ്ടിച്ചിരുന്നു.
