26 May, 2026 08:44:45 PM
ഷുഹൈബ് വധക്കേസ്: പ്രതികള്ക്ക് ജാമ്യം അനുവദിച്ച് ഹൈക്കോടതി
കൊച്ചി: ഷുഹൈബ് വധക്കേസില് ആകാശ് തില്ലങ്കേരി ഉള്പ്പെടെയുള്ള 17 പ്രതികള്ക്കും ജാമ്യം അനുവദിച്ച് ഹൈക്കോടതി. പ്രതികളുടെ ജാമ്യം റദ്ദാക്കിയ തലശേരി അഡീഷണല് സെക്ഷന് കോടതിയുടെ നടപടി ഹൈക്കോടതി റദ്ദാക്കി. മൂന്നാം അഡീഷണല് ജില്ലാ സെഷന്സ് ജഡ്ജി റൂബി കെ. ജോസ് ആണ് ഇന്നലെ വിചാരണക്കിടെ പ്രതികളുടെ ജാമ്യം റദ്ദാക്കിയത്. പ്രതികളെ ജുഡീഷ്യല് കസ്റ്റഡിയില് റിമാന്ഡ് ചെയ്യാനും കോടതി ഉത്തരവിട്ടിരുന്നു. ഇതേതുടര്ന്നാണ് പ്രതികള് ഹൈക്കോടതിയെ സമീപിച്ചത്. കഴിഞ്ഞ 18നാണ് കേസില് വിചാരണ ആരംഭിച്ചത്. ഒന്നാം സാക്ഷി റിയാസിനെ വിസ്തരിച്ചത് നിയമപരമായി നിലനില്ക്കില്ലെന്ന് പ്രതിഭാഗം കോടതിയില് വാദിച്ചെങ്കിലും കോടതി അംഗീകരിച്ചില്ല. ഇതിനെതിരെ പ്രതികള് അപ്പീല് നല്കിയിരുന്നു.
2018 ഫെബ്രുവരി 12നാണ് യൂത്ത് കോണ്ഗ്രസ് മട്ടന്നൂര് ബ്ലോക്ക് സെക്രട്ടറിയായിരുന്ന എടയന്നൂരിലെ എസ്.പി. ഷുഹൈബ് (29) കൊല്ലപ്പെട്ടത്. സുഹൃത്തുക്കള്ക്കൊപ്പം രാത്രി ചായക്കടയില് ഇരിക്കുന്നതിനിടെ ഷുഹൈബിനെ ബോംബെറിഞ്ഞ ശേഷം വെട്ടിക്കൊലപ്പെടുത്തുകയായിരുന്നു. ആകാശ് തില്ലങ്കേരി, പഴയപുരയില് രജില് രാജ്, കൃഷ്ണ നിവാസില് ദീപ്ചന്ദ്, തയ്യുള്ളതില് ടി.കെ. അസ്കര്, മുട്ടില്വീട്ടില് കെ. അഖില്, പുതിയപുരയില് പി.പി. അന്വര് സാദത്ത്, നിലാവില് സി. നിജില്, പി.കെ. അഭിനാഷ്, എ. ജിതിന്, സാജ് നിവാസില് കെ. സഞ്ജയ്, രജത് നിവാസില് കെ. രജത്ത്, കെ.വി. സംഗീത്, കെ. ബൈജു, കെ.പി. പ്രശാന്ത്, എ.പി. സനീഷ്, മുട്ടില് എ.കെ. സുബിന്, കേളോത്ത് വി. പ്രജിത്ത് എന്നിവരാണ് കേസിലെ പ്രതികള്.
