16 December, 2025 07:26:56 PM
സ്ഥാനാര്ഥികളുടെ മരണം; തെരഞ്ഞെടുപ്പ് മാറ്റിവെച്ച വാർഡുകളിൽ ജനുവരി 13ന് വോട്ടെടുപ്പ്
തിരുവനന്തപുരം: സ്ഥാനാര്ഥികളുടെ മരണത്തെത്തുടര്ന്ന് വോട്ടെടുപ്പ് മാറ്റിവച്ച മൂന്ന് തദ്ദേശ സ്വയംഭരണ വാര്ഡുകളിലേക്കുള്ള പ്രത്യേക തെരഞ്ഞെടുപ്പ് ജനുവരി 13 ന് നടത്തുമെന്ന് സംസ്ഥാന തെരഞ്ഞെടുപ്പ് കമ്മീഷണര് എ ഷാജഹാന്. വിജ്ഞാപനം നാളെ പുറപ്പെടുവിക്കും.തിരുവനന്തപുരം കോര്പ്പറേഷനിലെ വിഴിഞ്ഞം വാര്ഡ്, മലപ്പുറം ജില്ലയിലെ മൂത്തേടം ഗ്രാമപഞ്ചായത്തിലെ പായിമ്പാടം വാര്ഡ്, എറണാകുളം ജില്ലയിലെ പാമ്പാക്കുട ഗ്രാമപഞ്ചായത്തിലെ ഓണക്കൂര് വാര്ഡ് എന്നിവിടങ്ങളിലാണ് പ്രത്യേക തെരഞ്ഞെടുപ്പ് നടത്തുന്നത്. ഡിസംബര് 24 വരെ നാമനിര്ദ്ദേശ പത്രിക സമര്പ്പിക്കാം. പത്രികയുടെ സൂക്ഷമ പരിശോധന ഡിസംബര് 26 ന് നടക്കും. സ്ഥാനാര്ത്ഥിത്വം പിന്വലിക്കാനുള്ള അവസാന തിയതി ഡിസംബര് 29 ആണ്. വോട്ടെണ്ണല് 14 ന് നടക്കും. പ്രത്യേക തെരഞ്ഞെടുപ്പുള്ള വാര്ഡുകളില് നിലവില് സ്ഥാനാര്ഥികളായിട്ടുള്ളവര് വീണ്ടും പത്രിക സമര്പ്പിക്കേണ്ടതില്ല. തിരഞ്ഞെടുപ്പ് പ്രക്രിയ പൂര്ത്തിയാകുന്നതുവരെ മൂത്തേടം, പാമ്പാക്കുട ഗ്രാമപഞ്ചായത്തുകളില് പൂര്ണമായും തിരുവനന്തപുരം കോര്പ്പറേഷനിലെ വിഴിഞ്ഞം വാര്ഡില് മാത്രമായും മാതൃകാപെരുമാറ്റചട്ടം നിലനില്ക്കും.
