25 May, 2026 07:45:52 PM
'എല്ദോസ് കുന്നപ്പിള്ളി പീഡിപ്പിച്ചിട്ടില്ല'; അതിജീവിത മൊഴിമാറ്റി
തിരുവനന്തപുരം: മുന് പെരുമ്പാവൂര് എംഎല്എ എല്ദോസ് കുന്നപ്പിള്ളിക്കെതിരായ ബലാത്സംഗക്കേസില് മൊഴി മാറ്റി അതിജീവിത. എല്ദോസ് കുന്നപ്പള്ളി പീഡിപ്പിച്ചിട്ടില്ലെന്ന് അതിജീവിത നെയ്യാറ്റിന്കര കോടതിയില് വിചാരണയ്ക്കിടെ പറഞ്ഞു. ഏത് സാഹചര്യത്തിലാണ് അതിജീവിതയുടെ മൊഴിമാറ്റമെന്നത് വ്യക്തമല്ല. കേസിന്റെ തുടര്നടപടി കോടതി നാളെ പരിഗണിക്കും.
2022 സെപ്റ്റംബർ 28നാണു ശാരീരികമായി ഉപദ്രവിച്ചെന്നു കാട്ടി പേട്ട നിവാസിയായ യുവതി എൽദോസ് കുന്നപ്പിള്ളിക്കെതിരെ പരാതി നൽകിയത്. മദ്യപിച്ചു വീട്ടിലെത്തി തന്നെ ശാരീരികമായി ഉപദ്രവിച്ചെന്നും പിന്നീട് കാറില് ബലമായി കയറ്റി കോവളത്തേക്കു പോകുമ്പോള് വീണ്ടും ഉപദ്രവിച്ചെന്നുമായിരുന്നു പരാതി. കേസ് ഒത്തുതീര്പ്പാക്കാന് സിഐ ശ്രമിച്ചെന്നു യുവതി ആരോപിച്ചിരുന്നു. പരാതി പിന്വലിച്ചാല് 30 ലക്ഷംരൂപ നല്കാമെന്ന് എല്ദോസ് കുന്നപ്പിള്ളി വാഗ്ദാനം ചെയ്തിരുന്നതായും യുവതി വെളിപ്പെടുത്തിയിരുന്നു.
കോവളത്തുവച്ച് യുവതിയെ തള്ളിയിട്ട് കൊല്ലാന് ശ്രമിച്ചതായും കുറ്റപത്രത്തിലുണ്ട്. എംഎല്എ ബലാത്സംഗം ചെയ്തത് അഞ്ച് വര്ഷമായി പരിചയമുള്ള യുവതിയെയാണെന്നും കുറ്റപത്രത്തില് പറയുന്നു.
